O sábado, día 2 de xuño, André Graña (2º ESO) recibiu o seu premio na Asociación Cultural "O Facho" en A Coruña.
Un lote de libros, 400€ e un diploma acreditativo foi o que recibiu por esforzarse día a día no seu traballo en Lingua Castelá, xa que presentamos ao concurso Premio "Carlos Casares" unha das redaccións de "deberes".
Parabéns André!
E agora lede a redacción coa que gañou o premio:
Murmurio
a media noite
Unha noite estrelada
abríase paso entre a escuridade sobre o páramo de … pero non todo era luz e fermosura
neste inhóspito lugar, pois unha sombra de maldade cinguíase sobre os
habitantes da cidade.
Cando Robert descendeu
da súa montura estaba fatigado polo longo traxecto pero non tiña tempo de pensar
en descansar, tiña traballo que facer. Dirixiuse á pequena capela do centro da
cidade, como se lle ordenara, e agardou. Media hora máis tarde o reloxo de
pedra da capela tocaba as últimas badaladas antes das once. Aquel marabilloso
reloxo que nalgún tempo estivo decorado por grandes mosaicos que reflectían a
historia da cidade víase reducido agora a un vello artefacto no que apenas se
distinguían xa as agullas douradas que difundían co seu canto oxidado a chegada
das once e media. O momento era chegado. Un remuíño de po irrumpiu na praza
deixando ver unha figura fraca e encorvada vestida cunha capa da cor do ébano.
Recibiu o seu anfitrión cun leve pero letal navallazo no pescozo. Traballo cumprido,
dixo cando lle arrebatou o paquete redondo que portaba o ancián nas súas mans osudas.
Nada máis levantalo un
palmo do chan deuse de conta que pesaba cen veces máis do que el imaxinara e
tivo que volver a depositalo no chan mentres recuperaba forzas para volver a
coller aquel estraño obxecto.
Tras depositar a esfera no seu zurrón
camiñou de regreso ao bebedoiro, onde o agardaba ansioso por partir o seu
querido corcel. Mentres dispoñía todo para partir de novo alarmóuselle o pelo
da caluga. Non estaba só. Rápido coma o lóstrego despregou a súa navalla
preparado para calquera situación posible. Oíu pasos cerca que proviñan dun canellón
escuro que conducía a un coñecido casarío da cidade. Instintivamente flexionou
os xeonllos, preparado para botar a correr detrás do seu inimigo, pero non lle
fixo falta. Caeu ao chan de xeonllos, ao tempo que oía un murmurio indescifrable.
Escoitaba manar o seu propio sangue a través da fendedura que o atravesaba
polas costas.
Mentres se lle anubraban
os sentidos puido escoitar o reloxo da capela anunciar a media noite.
No hay comentarios:
Publicar un comentario